Ginapanawagan sang Punong Barangay sang Barangay 28, Bacolod City sa nagtuyo nga magkawat sang streetlight sa nasambit nga Barangay nga indi na pagsuliton bangud sa sunod nga madakpan ini siya ang ipapriso na.
Sang nagpadulong ang Bombo News Team sa Barangay 28 nahibaluan nga may yara sang napulo ka mga streetlights nga ginbutang agud nga masanag sa taytay ilabi na sa tion sang kagab-ihon kun maglabay ang mga residente halin sa tagsa ka mga trabaho.
Apang nakita nga halos wala na sang nabilin sa streetlights bangud amat amat na nga nagkalatumba bangud wala na sang screw.
Bangud lima nalang ang nabilin sa streetlights ginkuha nalang temporaryo sang Barangay ini bangud wala na sang crews kag delikado na sa mga nagalabay.
Sa interview sang Bombo Radyo Bacolod kay Punong Barangay Francisco Ilon III, sang Sabado sang gab-i may yara sang duha ka persona nga nagasakay sa motorsiklo kag naga-stand by sa taytay nga ginmuno sang ila nga mga Barangay Tanod kag naghambal nga may yara lang nga ginahulat.
Suno kay Ilon nga may nakakita nga residente nga isa ka babayi nga nagahulag ang poste kag naghambal nga may nagapangawat sini.
Gingwaan kag ginlaot sang residente kag Barangay Tanod apang wala gid ini malab-ot kag nakilala ang isa diri nga si Alyas Ramon nga residente sang Barangay 30.
Nakahingagaw ang mga ini sa pagpalagyo bangud may yara sila sang motorsiklo nga service.
Antes pa man natukiban nga ginkawat ang pila ka mga streetlights sa taytay natingala ang Punong Barangay nga madulom ang lugar.
Sa karun nagapanawagan ang Punong Barangay sa kay Alyas Ramon nga mag-untat na sa pagtuyo sa pagpangawat bangud kun madakpan siya ang ipapriso.
