Gin-akusahan sang ginaalegar drug lord nga si Kerwin Espinosa si former Philippine National Police chief kag Senator Ronald “Bato” dela Rosa nga siya ang ginpressure nga i-angot si former Senator Leila de Lima kag negosyante nga si Peter Lim sa illegal drug trade.
Ini ang ginpahayag ni Espinosa sa pagpadayon sang imbestigasyon sang House Quad Committee (QuadComm) natuhoy sa war on drugs sa idalum sang administrasyon ni former President Rodrigo Duterte.
Suno kay Espinosa, natabo ini sang Nobyembre 2016 sang siya ang nagbalik sa Pilipinas nagikan sa Abu Dhabi kun sa diin siya ang naaresto bangud sa kaso may kaangtanan sa illegal nga druga.
Suno sa iya, ang nagsugat sa iya amu si General Bato, gin-akbayan ini padulong sa salakyan nga Land Cruiser nga puti kag bullet-proof.
Sang nakasakay na sila, ginpatung-an ini sang duha ka mga pulis kag ginhambalan nga akuon sini nga siya ang may kaangtanan sa pagpalapta sang drugs sa Pilipinas kag dalahigon sini ang sanday Peter Lim kag Leila de Lima.
Suno diri, siya ang ginhambalan nga kun indi ini magsunod sa plano, matabo man sa iya ukon sa miyembro sang iya pamilya ang natabo sa amay sini nga si the late Albuera, Leyte Mayor Rolando Espinosa, nga napatay samtang yara sa prisuhan.
Gin-ako ni Espinosa nga ginkulbaan ini sadto kag wala ini nakahibalo sang iya himuon.// Nagpangayo man ini sa pasaylo kay De Lima sa iya ginhimo.
Samtang, ginkumpirmar man ni former PCSO general manager Royina Garma nga may yara sang reward system para sa police operatives nga nakapatay sa mga suspetsado sang alkalde pa lamang si former President Rodrigo Duterte sa Davao City.
Suno diri, ang reward ang nagadangat sa P20,000 tubtob P1 million depende sa level sang suspetsado.
Ang pinakamanubo nga level amu ang mga drug pushers.
Gin-ako man sini nga siya ang gintawgan ni Duterte sang Mayo 2016, ginhambalan nga sila ang magkitaay sa iya balay sa Davao kag ginhingyo nga magpangita sang pulis nga miyembro sang Iglesia Ni Cristo.
Suno kay Garma, ang ginaalegar “Davao model” ang ginreplicate sa bilog nga pungsod sang nangin Presidente si Duterte.
