Ginkumpirmar ni Bacolod City Lone District Congressman Greg Gasataya nga nalakip ang kidney dialysis center sa patindugon nga Bacolod City General Hospital nga ginaestablish sang Republic Act 11564.
Sa interview sang Bombo Radyo kay Gasataya, aminado ini nga dialysis patients ang ginakadtuan sang dako nga bahin sang medical assistance nga ginahatag sa congressional office kun sa diin 50 tubtub 100 ka pasyente ang average nga ginahatagan kada duha ka bulan.
Bangud sini, ginlakip ang dialysis center sa provision sang Republic Act 11564 nga magaprovide sang pondo para sa construction sang Bacolod City General Hospital.
Santo sa structural design sang ospital nga ginhimo sang Department of Public Works and Highways, ang isa ka panalgan sang 3-storey hospital ang para sa kidney dialysis center.
Subong nga tuig 2022, P450 million ang ginpain nga pondo para sa construction sang infrastructure apang igaduso sang kongresista nga mapondohan ang mga equipment nga ibutang diri sa 2023 national budget.
Kun mahuman na ang ospital kag kumpleto na ang equipment, igaturn-over na ang Bacolod City General Hospital sa Bacolod City government nga amo ang magabutang sang personnel apang magabulig man diri ang DOH.
Kun matapos na ang mga documentary requirements suno kay Gasataya, ginalauman nga magroundbreak na ang BCGH sa 1st quarter sang subong nga tuig kag on-track naman ang schedule para diri.
