Ginalantaw sang kilala nga abogado nga naggamit sang sobra-sobra nga pwersa kag indi husto nga implementasyon ang mga kapulisan sa pagsulod sa Kingdom of Jesus Christ Compound agud magserbe sang warrant of arrest batok kay Pastor Apollo Quiboloy.
Sa interview sang Bombo Radyo Bacolod kay Atty Levito Baligod, mismo ang korte sa Davao ang nagpaathag nga sila ang wala nagapugong sa implementasyon sang warrant of arrest apang indi dapat maggamit sang exessive force nga sa karun gindugangan pa kag nagadangata na sa singko mil.
Suno diri, panindugan sang Philippine National Police nga sila ang nakabatun sang impormasyon gikan sa duha ka anay miyembro sang KOJC nga si Quiboloy ang nagapanago sa sulod sang isa ka bunker ukon underground compartment.
Apang paathag sini nga specific ang ginatudlo sang ginahambal informant kag kuntani ginpamangkot na sa mga ini kun sa diin makit-an, bangod sa kapin 40 ka mga estraktura sa 30 hectares nga compound, indi man tanan ang sarang mabutangan sang bunker.
Dugang pa sini nga ang 50 tubtob 100 nga police personnel ang bastante na sa pagtsekyar sang kada establishimento kag sarang mahimo ang pagpangita sa hidden bunker sa sulod lamang sang duha ka adlaw.
Suno diri, ang korte ang nagpagwa sang mando sa pagkuha sang mga barikada apisar nga wala sang nabatun nga request bangod sila mismo ang nakakita nga may indi husto nga implementasyon.
Ginalantaw ni Baligod nga mahimo indi matuod ang ginapahayag informant kag ang purpose sang kapulisan amo ang maharras ang mga KOJC members sa compound samtang ikaduha na lamang nga option ang pag-aresto kay Quiboloy.
