Ginakasubo sang kilala nga abogado nga ginagamit bilang political tool ang pagpalawig sang termino sang mga Barangay officials sa anom ka tuig.
Sa interview sang Bombo Radyo Bacolod kay Atty Levito Baligod, kun sensero ang panghimanwa aminado ang abogado nga kulang gid man ang tatlo ka tuig nga termino sang mga Punong Barangay.
Apang ang tatlo ka tuig ang sobra-sobra na para sa mga indi maayo nga Punong Barangay para magtinir sa pwesto.
Nagapati si Baligod nga ini ang isa ka political question nga masabat lamang sang mga mamalidha.
Ginalantaw sini nga may-ara man sang basihan ang mga nagaduso sa term extensions kaangay sa economics kun sa diin tuman ka gastos ang asod-asod nga eleksyon.
Dugang nga nagabinahin-bahin ang mga tawo sa tion sang eleksyon, sa bisan diin sa barangay, district, province ukon national level.
Apang sa paglantaw sang abogado, tuman ka lawig ang anom ka tuig kag kun hatagan pa sang tyansa sa reelection, ang termino sang Punong Barangay ang magadangat na sa 12 ka tuig.
Suno diri, ini sarang magresulta sa political dynasty kag mahimo nga madulaan sang tyansa ang iban nga mas deserving sa pwesto.
Suhistyon sini nga magkompromiso na lamang sa pagbalik sang anay apat ka tuig nga termino.
Suno diri, sa pagduso sang mga Senador sa term extension, tuman man ang kalipay sang mga Punong Barangay kag iban nga mga Barangay officials, nga ginalantaw sini pinaagi agud nga magtanom sang utang nga kabalaslan sa mga national officials.
Karun nga nagahilapit ang 2025 midterm elections, ginalantaw nga pinaagi sa pagduso sang term extensions, ginakuha sang pila ka senador ang suporta sang mga barangay officials agud nga sila ang itib-ong kag makadaog sa eleksyon.
