Sa ginpatigayon nga conference sa Japan matapos ang apat ka adlaw nga state visit ni President Ferdinand Marcos Jr., ginpahayag sang Presidente nga indi ini ang dapat basulon sa nagainit nga tensyon sa pulitika sa pungsod.
Suno kay Marcos, ang mga persona nga ginasuguran sang “political heat” ang pareho man nga mga tawo nga padayon nga nagabatikos sa administrasyon.
Ginpanindugan sang presidente nga nakatutok lamang siya sa pagtrabaho kag indi sa inaway sa pulitika.
Gintumod man ni Marcos ang pila ka mga “obstructionists” nga wala na sang iban pa nga ginahimo kundi pamatukan ang kada tikang sang gobyerno.
Gintalakay man ang pila ka mga isyu nga ginapangatubang sang administrasyon kalakip ang indi paghangpanay sa tunga sang presidente kag bise presidente sang pungsod, kasubong man sang pagpanaug sang satisfaction rating ni Marcos base sa pinakaulihi nga survey sang Social Weather Station (SWS).
