Nagapangabay ang city administrator sang Bacolod City sa publiko nga tumanon ang mando ni Mayor Evelio “Bing” Leonardia nga pagdumili sa pagbisita sa mga patyo sa Oktubre 30 tubtob Nobyembre 1, 2021.
Suno kay Atty. Joseph Eduard Cuansing, likawan lang anay ang pagpadulong sa mga sementeryo sa nasambit nga petsa kag dapat panumdumon gid una ang ikaayong lawas kag kaluwasan batok sa virus.
Suno diri, isa sa mga concerns sang ciudad amo ang nagakatabo nga kinawatay kag vandalism sa patyo ilabi na sa Bacolod North Public Cemetery sa dalan Burgos.
Suno kay Cuansing, kinahanglan na gid ang bulig sang Bacolod Police Station 4 agud makontrol ang kinawatay sa patyo bangud wala man sang gwardiya diri kun gab-i.
Ginalantaw sang GSO nga gab-i nagaluntad ang kinawatay.
Suno diri, nagsulat sila sa Bacolod City Police Office subong nga adlaw agud hingyuon ang assistance sang Police Station 4 sa pagbantay sa patyo.
Ginpakigbahin sang station commander sang Bacolod Police Station 4 nga may nabaton sila nga reklamo nagikan sa mga himata ni BCPO Director Col. Thomas Joseph Martir nga nakuhaan sang lapida ang ila minatay.
Sa interview sang Bombo Radyo kay Police Major Richie Gohee, ginpahayag sini nga antes magtikalalag, nagpadulong ang mga himata sang city director sa Bacolod North Public Cemetery sa dalan Burgos kag yara pa ang lapida sang minatay apang pagbalik nila sini nga semana, wala na ini
Suno kay Gohee, ginpablotter ini sang pamilya kag ginreklamo sa Bacolod Government Center.
Suno sa iya, wala pa man ang pandemic, ginareklamo na ang mga nagakadula nga lapida, bulak kag mga kandila nga ginapanguha apisar nga wala pa maupod.
Suno diri, ginarecycle, ginabaid kag gina-engrave-an sang bag-o ang ginapangkawat nga lapida.
May nagpablotter man kahapon nga gin-exhume sa lulubngan ang minatay apang wala nakahibalo ang ma himata.
Gindugang man sini nga indi man nila mapatrolan ang patyo kun normal nga mga inadlaw bangud wala man sang tawo.
Nagpanugyan man ini nga tubtob lang alas 5:00 magabukas ang patyo subong nga adlaw kag pagasiraduhan na.
