Nagdangat sa 57 ka mga nasari-sari nga operasyon ang napatigayon kag 19 ka mga engkwentro ang nagluntad sa kabug-usan nga nasakupan sang 3rd Infantry Division sa una nga apat ka bulan subong nga tuig.
Sa interview sang Bombon Radyo Bacolod kay Army Major Cenon Pancito, tagpamaba sang 3rd Infantry Division, nagdangat sa 15 ang mga napatay nga New People’s Army (NPA) fighters kag duha ang nagkaladakpan sa 19 ka engkwentro.
Madumduman nga napulo ka mga katapo sang rebelde ang napatay sa engkwentro sa Negros Oriental.
Nakakompiskar man ang militar sang 24 ka armas-luthang kag natigayon nga masulod ang 15 tanan ka mga kampo sang NPA.
Samtang, kabug-usan naman nga 141 ka mga armas-luthang ang nasungka sa tropa sang gobyerno.
Kabug-usan naman nga 512 ka katapo sang NPA ang nagsurender sa isla sang Panay kag Negros.
Mas ginpasanyog pa sang Philippine Army ang ila nga efforts sa pagpakigbato agud matapna na ang insurhensya.
Ginalantaw man ni Pancito nga madamo pa sang accomplishments ang mahimo sang 3rd Infantry Division sa palaabuton nga second quarter kag sa nabilin nga mga inadlaw sang tuig 2021.
Tinutuyo sang 3rd ID nga matapos na ang insurhensya sa idalom sang ila nga area of operations.
Kun lantawon ang figures, natigayon na sang 3rd ID nga madismantle ang duha ka front sang NPA sa lima ka fronts apang ginalantaw sini nga matigayon man nila nga madismantle ang nabilin nga duha, kag ang isa nga gerilya front ang mapahina man.
