Ginakinahanglan sang mga kiosko nga magabaligya sang mga pagkaon sa mga festival sites subong nga Masskara Festival 2023 nga magkuha sang health card kag sanitary permit sa Bacolod City Health Office.
Sa interview sang Bombo Radyo Bacolod kay Dra. Grace Tan, Environmental Sanitation Division Head sa Bacolod City Health Office, ginarequire nga magproseso sang nasambitan nga special permits ang mga kiosk owners sa tion sang pagparehistro sa Bacolod Yuhum Foundation.
Magluwas sa special sanitary permit para sa kapiestahan, kinahanglan man nga maggawad sang health card nga mangin pamatuod man sang mga kiosko nga sila ang kabahin sa Masskara Festival 2023.
Panugyan ni Dra. Tan sa mga magalibot sa nanarisari nga mga kiosko nga nagabaligya sang pagkaon subong nga Masskara Festival nga mahimo nila nga matsekyar ang mga special permits sang mga balaligyaan agud makaseguro nga ang baligya ang natsekyar sang City Health.
Paathag sini nga ang City Health Office ang magalibot man sa mga festival sites agud seguruhon kun may-ara sang nagakaigo nga permits ang mga kiosko.
Aminado si Dra. Tan nga may-ara pa sang wala nakakuha sang permits, kag ang pagproseso ang nagapadayun pa ilabi na nga may iban nga festival sites nga sa masunod paman nga mga inadlaw magabukas.
Madumduman nga ang mga festival sites subong nga Masskara Festival 2023 ang ginalakipan sang pito ka venues nga ginabug-usan sang Bacolod City Government Center (BCGC), Bacolod City Public Plaza, Upper East Megaworld, Lacson Street, Bacolod City Old Airport, SM City Bacolod kag Baywalk.
