Ginalantaw nga maganubo sang 70 tubtob 80 porsyento ang kita sang mga lechonan kun magkanselar sang Christmas Party ang pila ka mga ahensya sang gobyerno.
Nahibaluan nga nagkanselar sang Christmas Party ang Armed Forces of the Philippines kag Philippine National Police bangud sa ginapangatubang nga COVID-19 pandemic.
Sa interview sang Bombo Radyo Bacolod kay Wilson Libera, manugbaligya sa Jessel’s Lechon, ginpahayag sini nga apisar magakanselar sang Christmas Party ang pila ka mga ahensya sang gobyerno, nagapati naman ini nga madamo sa gihapon nga mga pamilya ang magabakal sini sa Holiday season.
Suno kay Libera, bisan kinilo lang nga lechon, may pamilya gid nga matinguha nga makabakal sini.
Suno sa iya naga-amat-amat naman subong damo ang mga nagabakal sang ila lechon ilabi na nga may yara sila sang promo.
Nahibaluan nga nagabili sang P600 ang kilo sang lechon sa Jessel’s lechon kun sa diin may libre na ini nga isa ka litro sang softdrinks.
Samtang, P4,500 pasaka naman ang bili sang bilog nga lechon kun diin may paaman pa ini nga isa ka lechon manok kag isa ka litro nga softdrinks.
Sa karon indi pa masiguro ni Libera kun mapasaka sila sang presyo.
