Ginpahayag sang lola ni Freya Mae Diesmo Go nga mahimo sukmatan gid sini ang iloy sang bata kun sila ang magkit-anay bangod sa pagpatumbaya diri.
Madumduman nga nasapwan kahapon sang hapon ang bangkay ni Freya Go, 17 anyos nga nakabaklid, may gapos ang kamot kag wala na sang pang-idalom nga panapton.
Sa exclusive interview sang Bombo Radyo Bacolod kay Leah Diesmo, residente sang Brgy Baliwagan, San Enrique, nagbulagay ang iya bata nga si Sarah kag si Joselito Go sang pito ka tuig pa lamang si Freya.
Si Sarah ang nagbalik sa iya anay kahagugma samtang si Freya ang ginbilin naman kay Joselito.
Suno kay Leah, indi maayo ang pagtamdanay nila sang iya bata angot sa subang sini nga yara sa ila luyo kag ginapa-eskwela.
Ulihi nga nakacontact sa ila si Sarah sang ginpasugat nila si Freya nga nagpadulong sa La Carlota City sang Oktubre 5.
Wala man sila sang ihibalo kun sa diin nagapuyo si Sarah.
Suno kay Leah, apisar nga wala sa ila nagdako ang iya apo, tuman ka sakit para sa ila nga makita ang iya gindangatan.
Mabuot apang medyo masabad lamang ang paglaragway sini sa iya nga apo nga nagapamilit gid kun may ara sang gusto makuha.
Apang sa ulihi nila nga pagkitaay, aminado ang lola nga nagmature na ang iya apo.
Nagalain man ang buot sini sa iya bata nga si Sarah bangod ginpabay-an na lamang kay Joselito ang iya apo.
Pahanumdom sini nga bisan sila ang bulagay na, si Freya ang iya gihapon bata.
Kabahin sang exclusive interview kay Leah Diesmo, lola ni Freya Mae Diesmo Go
Sa karun, wala sila sang ihibalo kun sa diin ihaya si Freya, apang sila ang magakadto gid, kag luyag sini maatubang ang iya bata.