Suspendido ang klase sa ciudad sang Bacolod bwas nga adlaw, Agusto 29, bangud sa ginalauman nga pagbubo sang madamol nga ulan bangud sa epekto sang Bagyo Goring, samtang suspendido man ang trabaho sa mga opisina sa Bacolod City government.
Nahibaluan nga bwas man nga adlaw magabukas ang klase sa tanan nga public elementary kag high schools nationwide.
Sa interview sang Bombo Radyo Bacolod kay Dr. Anna Maria Laarni Pornan, pinuno sang City Disaster Risk Reduction and Management Office, nagsapol kaina ang Local Disaster Risk Reduction and Management Council kag nakasugtan nga irekomendar ang suspension sang klase sa tanan nga level.
Suno kay Pornan, ginaforecast nga madamol gihapon ang ulan bwas tubtub sa Huwebes.
Bangud madamo ang evacuees sa Bacolod, ginagamit ang pila ka mga eskwelahan bilang evacuation center, samtang manghimos naman ang makapauli na kun indi madamol ang ulan.
Ginpirmahan naman ni Mayor Alfredo Benitez ang rekomendasyon sang council.
Suno kay Pornan, Hanging Habagat nga ginapabaskog sang Bagyo Goring ang magadala sang madamol nga pag-ulan.
Halin kaina sang kaagahon tubtub kaina sang udto, 39 millimeters ang accumulated rainfall sa Bacolod kag halos wala nagauntat ang pagbubo sini.
Nagalaom naman ini nga indi na magtuman katodo ang pag-ulan bangud halin alas-8:00 sang gab-i tubtub ala-1:00 kaina sang kaagahon, 25 millimeters na ang accumulated rain tubtub nga nangin 39 millimeters tubtub kaina sang udto.
Bangud sa madamol nga pag-ulan, pila ka mga barangay sa Bacolod ang ginbaha, lakip na sa Dalan Araneta.
