Ginawelcome sang Department of Education-Division of Negros Occidental ang mga estudyante sa una nga adlaw sang pagbukas sang klase para sa school year 2025- 2026.
Sa interview sang Bombo Radyo Bacolod kay Ian Arnold Arnaez, Public Information Officer sang DepEd- Division of Negros Occidental, ginalauman nga masobra sa 1,500 ang dugang nga enrollees subong nga tuig sa kapin sa 324,000 ka mga enrollees sang tinalikdan nga tuig.
Suno diri, iban nga buluthuan wala pa man naka-encode sa number sang enrollees samtang padayon pa ang enrollment.
Suno kay Arnaez may yara sang polisiya ang DepEd kaangay sang no collection policy nga wala sang sukton sa bata, samtang indi man sila stirkto sa uniform bangod wala man sang problema kun wala naka-uniform ang bata basta desente lang ini tulokon.
Dugang pa sini, ang Birth certificate ukon PSA sang bata required nga ipasa apang wala man ini nagakahulogan nga indi pabatunon ang enrollment sang bata.
Panawagan ni Arnaiz, tutokan sang mga ginikanan ang pag-eskwela sang kabataan kag sa kabataan dapat nga magtoon sang husto. Samtang…ginpanawagan sang Department of Education-Division of Negros Occidental sa mga ginikanan nga bantayan ang pagtu-on sang bata kag disiplinahon ang ila paminatasan.
Sa interview sang Bombo Radyo Bacolod kay Ian Arnold Arnaez, Public Information Officer sang DepEd- Division of Negros Occidental, ginapangabay sini nga mangin produktibo ang pag-eskwela sang bata sa school year 2025-2026.
Suno diri, nagapanawagan sila sa mga ginikanan nga giyaan ang mga bata sa ila pagtu-on kag disiplina sa paminatasan agud tayoyon kag maayo nga ma-umpisa kag matapos ang school year… Sa pihak nga bahin,
nabatyagan ang mabug-at nga lakat sang trapiko kaina sang aga sa pagbukas sang klase.
Sa interview sang Bombo Radyo Bacolod kay Jose Antonio “Jojo” Robello, deputy head sang Bacolod Transportation and Traffic Management Department (BTTMD), nangin mabug-at ang lakat sang trapiko kaina kapin alas- 7:30 sang aga apang naghawan-hawan naman matapos ang 30 minutos.
Suno diri, ginalauman naman nga mangin matawhay bwas ang dalanon bangod sa una lang man nga adlaw kalabanan may yara sang delays.
Wala naman sang problema sa numero sang mga traffic enforcers nga gindeploy kun sa diin wala sila anay sang day off subong nga adlaw kag kalabanan gindeploy sa mga buluthuan.
