Nagapabilin nga kanselado ang mga klase sa pre-school tubtob senior high school sa pampubliko kag pribado nga eskwelahan sa ciudad sang Bacolod subong nga adlaw bangud sa Tropical Storm Kristine.
Kahapon, ginkansela man ni Bacolod City Mayor Alfredo “Albee” Benitez ang klase bangud sa nasambit tropical storm kag ini ang kasunod man sang rekomendasyon sang Disaster Risk Reduction Manage Office sa ciudad sang Bacolod.
Sa interview sang Bombo Radyo Bacolod kay Atty. Caesar Distrito, spokesperson sang alkalde, kanselado ang klase para sa preschool tubtob sa senior high school sa public kag private level apang ang college level naman ang magadepende sa desisyon sang school administration.
Suno kay Distrito, ang rason kun ngaa nagaka-ulihi ang pagpagwa sang abiso sang class suspension ang bangod nga ginahulat ang update sang Philippine Atmospheric, Geophysical and Astronomical Services Administration (PAGASA).
Apang, paathag sini nga kun kaisa indi na kinahanglan pa maghulat sang anunsyo kag sa tion nga mabaskog ang ulan mas maayo nga magdesisyon na lamang ang ginikanan nga indi na pagdal-on pa sa eskwelahan ang bata.
Pahayag ni Distrito, padayon ang pagpakig-angot sang alkalde sa mga Punong Barangay sa sitwasyon sa tagsa nila ka area of responsibility.
May yara naman sang nakapreparar nga mga food packs pananglitan nga kinahanglanon.
Sa karun ginabantayan sang ciudad ang forecast sang PAG-ASA kasubong man agud mahibaluan kun magapatuman sang class suspension sa Miyerkules.
Sa pihak nga bahin may yara man sang ihatag nga burial assistance sa pamilya sang pito ka tuig nga lapsag nga aksidente nga nalumos sa balde nga may tubig.
Kasubong man nga wala sang klase sa Talisay City, EB Magalona, Moises Padilla kag Kabankalan City sa probinsya sang Negros Occidental.
