Bangod sa padayun nga mga pag-ulan kag paandam sang PAGASA sa pagpadayun pa sang malain nga tiyempo, pila ka mga syudad kag banwa ang nag-anunsyar na sang extension sang pagpatuman sang class suspension subong nga adlaw.
Alas-8:00 kagab-i, ginpagwa sang PAGASA ang Heavy Rainfall Warning No. 11 kun sa diin napaidalum sa Red Warning Level ang Bago City, Manapla, Victorias City, EB Magalona, Silay City, Talisay City, Valladolid, San Enrique, Pontevedra, Hinigaran, Binalbagan kag Pulupandan sa Negros Occidental kasubong man ang Bacolod City.
Ang nasambitan nga mga lugar ang may dako nga risgo nga maka-eksperyensya sang seryoso nga mga pagbaha partikular na sa mga low-lying areas kasubong man landslide sa mga nabukid nga lugar.
Samtang Orange Warning Level naman ang gindagdag sa nabilin nga bahin sang probinsya.
Bangod sini, nag-anunsyar sang pagpalawig sang suspension sang klase sa tanan nga levels, pampubliko man ukon pribado ang Bacolod City, Bago City, Himamaylan City, EB Magalona, Manapla, Hinigaran, La Carlota, Murcia, Hinobaan, Talisay City kag Silay City.
Suno sa Bacolod City Public Information Office, ang desisyon ang ila nga ginpagwa matapos nga ginpaidalum sa Blue Alert Status ang Regional Disaster Risk Reduction and Management Council (RDRRMC).
Sa Blue Alert Status, tanan nga regional kag local Disaster Risk Reduction and Management Offices (DRRMOs) ang ginamanduan sa pagdayun nga pagmonitor sa ila nga mga Area of Responsibilities (AORs) kag kahandaan para sa deployment.
Santo sa Emergency Operations Center (EOC) sang Office of Civil Defense (OCD) kag RDRRMC, may-ara 14 ka pamilya ukon 52 ka indibidwal nga naapektuhan gikan sa isa ka barangay sa syudad sang San Carlos samtang apat naman ka pamilya ukon 28 ka indibidwal ang yara sa karun sa evacuation centers.
Sa pihak sini, gin-anunsyar ni San Carlos City Mayor Renato Gustilo nga fake news ang nagalapta nga impormasyon sa social media nga may extension ang suspension of classes subong nga adlaw.
Paathag sang alkalde nga tubtob lamang sa Mayo 4 ang ginpagwa sini nga Executive Order natuhoy sa suspension of classes, gani balik na ang klase sa tanan nga level subong nga adlaw.
