Ginsupender ang klase sa EB Magalona National High School subong nga adlaw kasunod sa naglapta nga online threat sa nasambit nga eskwelahan.
Sa ginpaggwa nga statement ni EB Magalona Mayor Matthew Louis Malacon, ginkumpirmar sini nga ang pagpamahog ang gin-post sang unidentified netizen sa Facebook.
Sa mensahe, pahayag sang nagapamahog sanga maghanda na ang EB Magalona bangod tanan ang magkalamatay kag wala sang mabilin bisan isa.
Ang pamahog ang ginpost sa facebook alas-10:18 sang gab-i, kag naglapta paagi sa mga group chats.
Agud makaseguro, ginkanselar ang klase sa EB Magalona National High School kasubong man sa Elementary School.
Gin-abisohan ni Malacon ang publiko nga indi magpanic bangud gina-usisa na sang mga otoridad ang nasambit nga insidente.
Sa interview sang Bombo Radyo kay Police Major Judesses Catalogo, spokesperson sang Negros Occidental Police Provincial Office (NOCPPO), nakigkoordinar na sila sa EB Magalona Local Government Unit, District School Supervisor kasubong man sa Cyber Crime Unit agud matumod kun sin-o ang yara sa likod sang nasambit nga prank shooting threat.
Pasalig sini nga ginaseryoso sang kapulisan ang pamahog, kag ginaseguro nila nga wala sang matabo nga trahedya.
