Ginpahibalo nalang sang Punong Barangay sang Barangay 12, syudad sang Talisay ang school principal sang Rafael B. Lacson Memorial High School nga may may yara sang tsekyaron ang mga kapulisan sang Talisay City Police Station gani agud nga indi maalarma ang mga estudyante ginpaevacuate na sang mga ini ang mga kabataan.
Sa interview sang Bombo Radyo kay Principal 3 Marites Rivera, ginsuspend na sini ang klase subong nga adlaw agud nga makapatigayon sang pagtsekyar ang mga kapulisan agud nga masiguro nga hilway ang mga kabataan nga makabalik kasunod sang pagrekober sang granada sa Grade 10 student nga si Bronson Lucas Lacson, 21 anyos, residente sang Zone 6, syudad sang Talisay, Negros Occidental.
Suno kay Rivera, nagapatigayon lamang sila sang random checking sang mga estudyante nga nagasulod sa eskwelahan bangud may yara lamang sila sang duha ka security guards kun aga kag isa kun gab-i.
Aminado man ini nga indi man tanan matsekyar bangud may yara sila sang 4470 ka mga estudyante.Suno kay Rivera, mahimo ang Grade 10 student nga nakuhaan sang granada kag isa ka sachet sang marijuana ang wala nag-agi sa gate.
Ginpahayahag man sini nga nareport naman niya sa Division Office ang natabo sa eskwelahan kag gin-abisuhan ini nga isuspend ang klase kag mangayo sang clearance nagikan sa mga kapulisan nga hilway na ang magbalik ang mga estudyante.
Suno kay Rivera, macoordinate man ini sa Local Government Unit sa syudad sang Talisay agud mabuligan sila nga madugangan ang ila nga security personnel agud masiguro ang safety sang mga estudyante.
Nagpanugyan man ini sa mga estudyante nga dapat magsuksok sang uniporme sa tion nga magsulod sa eskwelahan.
