Padayun ang monitoring sang mga Local Disaster Risk Reduction and Management Office sang banwa sang Hinobaan kag Sipalay City sa water level sa mga suba matapos ang mabaskog kag malawig nga pag-ulan, samtang ginkanselar man ang face-to-face classes.
Ang mabaskog nga ulan nga may kaupod nga makusog nga hangin ang ginalantaw tuga sang Southwest Monsoon ukon Hangin Habagat nga ginpasanyog sang Tropical Depression ISANG.
Sa interview sang Bombo Radyo Bacolod kay Sipalay CDRRMO Head Dionelo Bogtae, alas-4:00 pa lamang sang aga, nabatyagan na ang mabaskog kag segi-segi nga pag-ulan gani ginrekomendar ang suspension sang face-to-face classes.
Suno diri, sa ila monitoring gikan sa mga Barangay, nalikop gid ang bilog nga Sipalay City sang mabaskog nga ulan.
Ginabantayan man nila ang water level sa mga suba, kun sa diin nakitaan sang hamay nga pagsaka.
Ini ang ginalantaw tuga sang high tide ukon taob sa baybayon samtang malubog man ang tubig nga nagapatimaan nga mabaskog ang ulan sa bukid.
Ginpa-alerto naman nila ang tagsa ka Barangay DRRMO kag ginpahanumdom nga magreport gilayon kun may magluntad nga pagbaha, agud sila ang gilayon maka-augment kun may magakinahanglan sang rescue.
Samtang ang klase sa hapon lamang ang ginsuspender sang Hinobaan Municipal Government subong nga adlaw.
Sa interview sang Bombo Radyo Bacolod kay Mayor Daph Anthony Reliquias, sang magbubo ang madamol nga ulan, yara na sa mga eskwelahan ang mga kabataan.
Bangod sini, sila ang nagdeklarar na lamang sang suspension sang klase sumugod ala-1:00 sang hapon.
Ginpadulungan man sang alkalde ang coastal areas sa banwa kag nakita nga dalagko ang mga balod.
Sa karun, wala paman ini sang nabatun nga report sang mga insidente kaangay sang nagkalatumba nga kahoy sa mga dalan kag mga pagbaha.
