Balik na sa normal ang garbage collection sa ciudad sang Bacolod.
Sa interview sang Bombo Radyo Bacolod kay Bacolod Environment and Natural Resources Office (BENRO) Head Ma Fe Tresfuentes, nangin problematic ang garbage collection sa una nga senimana sang bulan sang Mayo, kun sa diin madamo sang mga nagareklamo nga wala nagakahakot sang IMP Construction and Development Corporation ang ila nga basura.
Suno kay Tresfuentes, Abril 30 pa lamang, nagtawag na ini sa IMP CDC kun ano ang rasun sa mahina nga performance sa garbage collection, kag ginpaathag sa iya nga madamo sang mga nagresign nga paleros.
Suno diri, pipila lamang ang nagsumiter sang resignation letter kag ang iban ang hinali na lamang nga wala nagpakita.
Natumod sini nga ang mga naghalin nga palero ang nagsaylo sa ginaconstruct sa karun nga solar farm sa Brgy Felisa, nga nagakinahanglan man sang 500 tubtob 1,000 nga mga trabahante.
Aminado man ini nga kun sa pagpili sang trabaho, last sa option ang pagpanghakot sang basura, apisar nga parehas lamang ang benepisyo.
Sa karun, nagbukas sang 60 ka job vacancy sa mga paleros ang IPM CDC.
Suno kay Tresfuentes, ang IPM CDC ang wala nakacomply sa kontrata nga sila ang dapat makahakot sang 400 tonnes per day nga mga basura sa nakaligad bangod sa kakulang sang manpower.
Nahibaluan nga sang magtakop ang 2024, may-ara sang 360 personnel ang IPM CDC kun sa diin 268 ang mga paleros.
Ginpasalig naman sini nga nakabalik na ang normal nga garbage collection, apang may pagbag-o sa schedule.
Sa bag-o nga schedule, adlaw-adlaw ang paghakot sang basura sa mga main road.
Lunes kag Huwebes naman sa Barangays Banago, Bata, Granada, Villamonte, Mandalagan, Alangilan kag Montevista; Martes kag Biyernes naman sa Barangays Estefania, Taculing kag Mansilingan; Miyerkules kag Sabado naman sa Barangays Singcang-Airport, Tangub, Alijis, Pahanocoy, Punta Taytay, Sum-Ag, Cabug, Vista Alegre, Handumanan kag Felisa.
Kun may reklamo bangod sa wala nahakot nga basura, magcontact lamang sa IPM sa 09773651828 kag 19704930336; kasubong man sa BENRO sa 09695944635 kag 099816198393.
