Ginapaabot na sang Bacolod Environment and Natural Resources Office (BENRO) nga mas madamo ang volume sang basura nga makolekta subong nga Disyembre.
Sa interview sang Bombo Radyo Bacolod kay BENRO Head Ma. Fe Tresfuentes, natalupangdan nila nga nagagutok na sa karun ang trapiko sa Bacolod City, nga nagapakita nga madamo sang mga nagasulod nga gikan sa iban nga mga banwa kag ciudad bangod man sa holiday rush.
Kadungan sini, ginalauman na ang pagdako sang volume sang basura.
Ang pinakadako nga source sang basura subong nga Christmas season ang gikan sa mga restaurants kag hotels nga may ginapatigayon nga mga celebrations kasubong man ang mga shoppers.
Suno kay Tresfuentes nga gin-extend na sang Sangguniang Panlungsod sang isa ka bulan ang kontrata sang IPM-Construction and Development Corp. (IPM-CDC) Waste Management bangod ini ang maga-expire na subong nga Disyembre para sa parehas nga hauling kag landfill management.
Paathag sini nga 347 tonnes per day lamang ang maximum volume sang basura nga kinahanglan hakuton sang IPM santo sa kontrarta.
Ang nabilin sini ang ginahimos na lamang sang Barangay ukon pribado nga sektor.
Aminado si Tresfuentes nga magluwas sa regular nga ginahakot, may-ara pa sang mga ginahimo nga illegal dumping sa mga bakante nga lote nga dapat mahimos.
Bangod sini, ginalantaw nila nga mapasaka ang maximum volume sang mahakot nga basura sa 380 tubtob 400 tonnes per day sa masunod nga bidding process.
Kun may ara sang concerns angot sa basura, mahimo nga makig-angot sa IPM sa 09773651828, BENRO sa 09695944635 / 09981618393 ukon landline no. 700-0302.
