Nagpatigayon sang komemorasyon sa kamatayon ni Dr. Jose Rizal ang mga estudyante kag manunudlo sa Rizal Elementary School kadungan sa 127th Death Anniversary ang Philippine National Hero kaina sang aga.
Ang “Tableau Rizal’s Death” ang may tema nga “Rizal, pundasyon ng kahapon, isinasabuhay ngayon”.
Bilang representante sang Bacolod City Government, naghatag man sang speech si Councilor Jude Thaddeus Sayson sa nasambitan nga programa.
Pahayag sang konsehal nga dapat pamarisan ukon lapawan pa natun ang pagkabaganihan ni Rizal bangod wala sang luyag nga makaligad sang 100 ka tuig mauyang lang ang kamatayon sang National Hero.
Suno diri, dapat nga mapadumdom sa mga kabataan sa karun nga si Rizal ang napatay agud mabawi ang kahilwayan ukon freedom para sang mga Pilipino.
Pahanumdom sini nga kaangay man ang ginapakigbato sa karun, ang freedom batok sa iban nga pungsod kag freedom gikan sa kapigaduhon.
Suno kay Sayson, ini man ang focus ni Bacolod City Mayor Alfredo “Albee” Benitez kag sa duha ka tuig sini nga serbisyo nakita man nga na-elevate ukon napasaka sini ang pagpangabuhi sang mga Bacolodnon.
Sa pihak nga bahin, panawagan sang konsehal nga suportahan ang pagpakig-away sang Pilipinas para sa West Philippine Sea gikan sa pagpang-agaw sang China.
Suno diri, humalin sang natabo ang World War II, ini ang labing una nga kahigayunan nga ang Pilipinas ang nagpangatubang sa territorial dispute sa iban nga pungsod.
Samtang sa mensahe naman ni Pedro Crispe Jr., principal 4 sa Rizal Elementary School, ginakomemorar ang 127th death anniversary sang National Hero, nga isa sa nangin pundasyon sa kahilwayan sang pungsod pinaagi sa iya writings kag activism.
Ang pagkabaganihan, gintudlo kag kaisog nga ginpakita ni Dr Jose Rizal ang nagshape sa pungsod gani ginadumdom gid ang kamatayon sang baganihan bilang pagkilala sa iya nangin kontribusyon sa sosyodad.
Kalakip diri ang patriotism, pride kag gratitude sa mga pagbag-o nga nahimo ni Rizal kag iban pa natun nga mga baganihan sa kabuhi sang mga Pilipino tubtob sa karun nga henerasyon.
Gani paathag ni Crispe nga kaangay kay Rizal, dapat makita man sa atun ang pagpalangga sa pungsod, paghatag importansya sa edukasyon kag pagserbe sa isig-kapareho.
Nagalaom ang prinsipal, nga ang freedom, demokrasiya kag progreso nga gina-enjoy natun sa karun ang mapakigbahin pa sa iban kag maka-inspire sa ila ideals.
Dugang pa sini nga ang tanan ang legasiya kag regalo nga ginbilin ni Rizal para sa atun kag sa mga masunod pa nga henerasyon.
