Nag-panugyan ang komisyoner sang Commission on Elections sa tanan nga mga kapulisan kag suldado nga iga-destino sa banwa sang Moises Padilla nga mangin alerto, vigilante kag hugton ang pagbantay ilabi na sa maabot nga piniliay.
Sa pag-padulong ni Antonio Kho, chairman sang Comelec task force sa nasambit nga banwa kahapon, ginpahayag sini nga dapat hugton ang pagbantay sang mga otoridad sa seguridad sang mga pumuluyo sa lugar ilabi na sa mga nagaboto.
Suno sa iya, indi lang dapat ang mga otoridad ang maghatag sang kumpyansa kundi pati man ang publiko bangud indi mahibaluan kun ano ang posible nga matabo sa tion sang eleksyon ilabi na nga naga-initay ang politika sa lugar.
Ang tanan naman nga pagahimuon sang mga otoridad ang dapat man nga i-konsolta kay Atty. Jessie Suarez.
Si Suarez ang mangin Officer-in-charge sang Comelec sa banwa ukon maga-akto bilang alkalde samtang yara pa nabutang sa idalum sang comelec control ang Moises Padilla.
Dugang pa ni Kho, ang pag-butang sang isa ka lugar sa idalum sang comelec control ang isa ka “special order” gikan sa Commission on Elections kag malaka lang suno sa iya ang mga lugar sa Pilipinas nga ginabutang sa idalum sini lakip na ang banwa sang Moises Padilla.
Kun madumduman, ginbutang na kahapon nga adlaw sa idalum sang comelec control ang Moises Padilla kasunod sa pag-aprubar sang Comelec en banc sa resolusyon sini kag sa natabo nga pag-ambush sa convoy ni Vice Mayor Ella Celestina Garcia-Yulo sa Barangay Inolingan kun sa diin napatay ang iya utod nga si anay punong barangay Mark Garcia kag hinablos nga si Councilor Michael Garcia sadtong Abril 25.
