Lima ang napilasan nga mga Blue Guards kag lima man ang napilasan nga Agrarian Reform Beneficiaries matapos ang komosyon may kaangtanan sa duta sa Hacienda Bias, Brgy Guimbala-on, Silay City, Negros Occidental.
Sa interview sang Bombo Radyo Bacolod kay Nerilyn Caldera, isa sa mga ARBs, nag-umpisa ang komosyon kapin alas-9:30 kaina sang aga.
Ini bangod ginabalabagan nila ang pagpa-arado sang kampo bangod sila ang may-ara sang motion for intervention kag wala pa makaabot ang resulta.
Nahibaluan nga may ginpagwa na nga order ang Department of Agrarian Reform Central Office nga nagahatag sang duta kay Gretchen Vargas.
Si Vargas ang nagpadala sang duha ka traktora agud mag-arado sang kampo kag may ginpabantay nga mga blue guards.
Suno kay Caldera, sang sila ang naghambal nga magatawag sang pulis, gingapos sang mga gwardiya ang isa nila ka kaupod kag ginpahayag nga posasan.
Apang aminado ini nga wala siya sang nakita nga posas.
Didto na nag-umpisa nga nagbato ang mga ARBs kag gin-updan sang iban pa.
Lima ang nagkalapilasan sa ulo, guya, abaga, paa kag iban pa.
Suno kay Caldera, sila ang nagapanindugan bangod nadaog na nila ang duha ka kaso, apang nakibot ang mga ini sang magrelease sang order ang DAR Central Office nga nagahatag sang propedad kay Vargas.
Dugang pa nga ini ang ginpublish sa pahayagan apang sila ang wala ginpahibalo sang DAR Provincial Office.
Gani sila ang nagfile sang motion for intervention sa notice of finality nga ginpagwa, kag nagahulat pa sang desisyon, apang luyag na nga ipa-arado ni Vargas ang duta nga ila na natamnan kag naabunuhan.
Samtang ginpanindugan naman sang operation manager sang RCP Security Agency nga una nga ginpanglagas sang mga tawo sa uma ang ila mga gwardiya.
Sa interview sang Bombo Radyo Bacolod kay Reynaldo Panuela, ginatuman lamang nila ang mando sang ila kliyente nga pagbantay sa duha ka mga traktora nga maga-arado sang duta.
Apang sila ang ginbalabagan kag ginpanglagas sang mga tawo kag tuyo pa sang mga ini nga ihold ang traktora.
Dugang pa niya nga may mga dugang pa nga nag-alabot kag nagdangat sa 30 ang naatubang sang iya 17 ka tawo.
Bisan si Panuela ang nakaangkon man sang pilas matapos maigo sang kutsilyo samtang ang iban sini nga kaupdanan ang may samad tuga sang pagpanglampos.
Panindugan sini nga sa ila pag-abot nagtinguha pa sila nga madala sa estorya ang mga ARBs apang ang mga ini ang wala naman nagapamati kag nagapanindugan gid sang ila.
Pasalig sini nga sila ang may mga video evidence nga makapamatuod nga gin-implementar gid sang mga gwardiya ang maximum tolerance.
Suno diri, bisan mga pulis ang ginahampak sang mga ARBs.
Panindugan sini nga sila ang magafile sang kaso kag napat-inan man nila ang mga nawong sang mga naka-atubang.
