Indi makabig nga “misunderstanding” ukon aksidente ang latest nga insidente sang Ayungin Shoal kundi isa ka hungod nga tikang sang Chinese government suno kay Defense Secretary Gilberto Teodoro Jr.
Sa isa ka press briefing sa Malacanang, ginpahayag ni Teodoro nga ang natabo sa Ayungin shoal ang hungod nga ginhimo sang China agud mapunggan ang tropa sang Pilipinas sa pagpatigayon sang mission.
Suno diri, matapos ang ila pagbisita sa mga tropa sa Palawan kun sa diin personal nga nakighinun-anon ang Presidente sa mga suldado nga nagpatigayon sang resupply mission, ila naconclude nga indi ini misunderstanding ukon aksidente kundi agresibo kag illegal nga paggamit sang pwersa.
Si Bersamin, nga amu ang chairman sang Philippine National Maritime Council, ang una na nga nagpahayag nga ang insidente ang posible misunderstanding lamang ukon aksidente kag indi ini matawag nga “armed attack.”
Suno diri, preliminary assessment lamang ini sadto apang matapos ang trip sang Presidente padulong sa Palawan, mas nagbakod ang conclusion nga ginhungod ining insidente.
