Ginaduso sang isa ka mamalidha nga imbestigiran sang National Bureau of Investigation (NBI) ang “kill” remarks ni former President Rodrigo Duterte batok sa mga Senador.
Madumduman nga sa pagtililipon sa San Juan City, nagbuya sang pahayag si Duterte natuhoy sa pagpatay sang 15 ka mga Senador agud mahatagan sang bakante ang mga senatorial candidates nga iya ginasuportahan.
Suno kay Lanao del Sur Representative Zia Alonto Adiong, mahimo nga ireview sang NBI ang statement ni Duterte.
Panindugan sang kongresista nga kun gina-imbestigaran sang NBI ang kill threat ni Vice President Sara Duterte batok kay President Ferdinand Marcos Jr., nagakadapat lamang nga kaangay man ang lebel sang paglantaw sa pahayag sang anay president.
Madumduman nga una na nga ginpasakaan sang NBI sang panumbongon nga inciting to sedition kag grave threat batok kay VP Sara bangod sa gina-alegar pagpamahog sini sa kabuhi sang Presidente.
Panindugan ni Adiong nga kun ang pahayag ni VP Sara ang nagakaigo na agud patigayunan sang imbestigasyon, dapat nga kaangay man ang imbestigasyon sa kaangay nga deklarasyon nga ginhimo sang iya amay.
Dugang pa sini nga kun may penalidad sa mga nagahimo sang bomb jokes sa mga airports, dapat nga pasabton man ang mga hayagan nga nagapamahog sang pagpatay sang 15 ka mga Senador.
Panindugan sini nga dapat tindugan sang hugot sang NBI ang rule of law, demokrasiya kag accountability.
