Ginpanindugan ni Bukidnon 2nd District Rep. Jonathan Keith Flores nga indi dapat mangin rason ang gina-eksperyensya subong nga krisis sa enerhiya agud mapauntat ang proseso sang impeachment batok kay Vice President Sara Duterte.
Suno kay Flores, nga amo man ang Vice Chairperson sang House Committee on Justice, ginamando sang Konstitusyon ang pagsunod sa gintalana nga impeachment timeline, gani wala sila sang legal nga basehan agud ini ang i-set aside ukon temporaryo nga ipa-iway.
Ginpahanumdom sang mamalidha nga may nakaligad na nga desisyon ang Korte Suprema batok sa Kamara natuhoy sa paglapas sa deadlines sa amo nga mga kaso.
Suno sa iya, ang konstitusyon ang nagamando nga dapat ini atubangon.
Nagsabat man si Flores sa mga komento nga dapat magtutok lamang ang Kongreso sa krisis sa enerhiya tuga sang tensyon sa Middle East.
Suno sa iya, ang Kamara ang may bastante nga mga mamalidha nga makatuman sang nagkalainlain nga mga katungdanan.
Sa kabug-usan nga numero sang masobra 300 ka mga miyembro sang Kamara, suno diri, 50 lang ka mga mamalidha ang kabahin sang Committee on Justice.
