Gintindugan sang kongresista nga magaserbe nga isa sa mga prosecutor sa impeachment trial ni Vice President Sara Duterte, nga temprano pa nga magconvene ang Senado bangod ini ang oportunidad man sang Bise Presidente nga madepensahan ang kaugalingon.
Sa interview sang Bombo Radyo Bacolod kay Iloilo 3rd District Representative Laurence Defensor, ginapasalamatan sini ang pagsalig kag kumpyansa nga ginhatag sang 215 ka nga Kongresista nga nagpirma sa ika-apat nga impeachment complaint.
Bilang prosecutor sila amo ang magalatag sang mga ebidensya kag mapresentar sang testigo nga magasuporta kun ngaa dapat ma-impeach si VP Sara.
Samtang sila man ang magasabat sa ebidensya nga mahimo gamiton sang respondent.
Pangabay sini sa Senado nga magconvene sang temprano bilang impeachment court agud mapagwa na ang mga ebidensya, masabat kag mahatagan sang resolusyon.
Dugang pa sini nga preparado na ang ila prosecutor team nga ginabug-usan sang 11 ka abogado, bangod masanag ang natipon nila nga ebidensya batok sa Bise Presidente.
Suno kay Defensor, ini ang tyansa man ni VP Sara nga makapresentar sang ebidensya nga makapamatuod kun siya ang inosente kag indi dapat ma-impeach.
Paathag sini nga gin-archive na sang House of Representative ang tatlo ka nauna nga impeachment complaint, bangod ang una ang tuman ka damo, samtang ang duha ka nagsunod ang kulang naman ang kaundan agud ma-impeach si VP Sara.
Gani nagdesisyon ang mga Kongresista nga sila na mismo ang magafile sang complaint kag ini ang mas masanag kag klaro bangod sila ang mas mas mabakod nga ebidensya.
Panindugan ni Defensor nga sila ang may Constitutional mandate para sa pumuluyo gani ang 215 ang nagpirma nga wala sang kabaylo.
Nagalaom man ini nga mangin patas ang Senado sa pagbatun sang mga ebidensya.
