Ginpahayag ni Negros Occidental 5th District Representative Dino Yulo, dako nga kabalaka ang pagnubo sang mill gate price sang kalamay nga makaapekto sa lakat sang ekonomiya sang probinsya.
Sa interview sang Bombo Radyo kay Congressman Dino Yulo, ini dako nga kabalaka bangod indi lang apektado diri ang local producers apang ilabi nga apektado diri amo ang magagmay nga planters nga mangin dako nga epekto sa ekonomiya sang probinsya.
Suno diri, nag-umpisa nga nagnubo ang mill gate price sang kalamay sang bulan sang Nobyembre ilabi na sang magsaka ang presyo sang abuno kag krudo.
Pahayag ni Yulo, mas manubo pa ang mill gate price sangsa nagasto sang mga sugar planters apang isa pa gid ka ginakasubo sini amo nga wala man gihapon sang mabakal nga manubo nga presyo sang kalamay ang mga konsumedor.
Nagapanawagan ini sa Sugar Regulatory Administration nga mag-intervene sa national government bangod ini maka-apekto sa lakat sang ekonomiya.
Mensahe sini sa mga sugar producers nga magpabati sang ila tingog agud mabatian sang gobyerno ang ila nga kinahanglan.
