Gin-athag sang konsehal sa ciudad sang Bacolod nga sala ang nagalapta nga estorya nga ang pondo sa pagpatukod sang Legislative Building ang P1 billion bangud ini ang yara lamang sa P515 million.
Sa interview sang Bombo Radyo Bacolod kay Bacolod City Councilor Atty. Caesar Distrito, konsehal nga 17 tanan ka mga proyekto ang pagagamitan sang gin-loan sang ciudad.
Suno Distrito, ang naaprubahan nga budget santo contrata sa legislative building ang yara lamang sa P514.6 million.
Suno kay Distrito ang nabayad pa lamang sang ciudad sa contractor ang P350 million kag ang completion ang yara sa 74 percent.
Ginpahayag man sini nga ang P200 million sa P525 million nga pondo sa pag-repair sang Burgos Public Market nga gin-realign matapos wala magpasugot ang stakeholders ang wala pa ma-bidding.
Nakasaad sa contrata nga matapos ang legislative building sa sulod sang 840 days apang nagpangayo man ang mga ini sang extension sa City Engineers Office.
Dugang pa sini nga ang Commission on Audit ang nagapatigayon sang Audit kag nakita man sa Audit Report sang 2025 nga wala sang discrepancy.
Ginpahayag man sini nga indi man ma-qualify sa fraud audit kun ang basehan delay lamang sang proyekto.
Panawagan sini nga wala ang mga ini nahadlok sa audit bangud bisan wala sang request ang COA ang nagapatigayon sini kag kun may yara ang mga ini sang ebidensya nga may discrepancy, ipakita sang mga ini kag ipunggkuan nila sa City Council.
