Pangabay sang konsehal kag abogado sa ciudad sang Bacolod nga dapat base sa ebidensya kag base sa konsensya ang pagdesisyon sa impeachment trial ni Vice President Sara Duterte kag indi bangod sa partido sa politika.
Sa interview sang Bombo Radyo Bacolod kay Councilor Atty Renecito Novero, bisan suguran pa sang Senado ang impeachment trial, ini ang indi man gihapon matapos tubtob nga magsarado ang 19th Congress, gani ini ang sal-on gihapon sang mga Senador nga magapungko sa 20th Congress.
Ini bangod madamo pa sang paga-agyan nga proseso kag cross examinations, rebuttals kag iban pa sa mga ilatag nga ebidensya sa impeachment trial.
Paathag ni Novero nga sa Kamara, matapos sang May 12 Elections, bag-o naman nga termino ang pagapungkuan sang mga kongresista, samtang continuing body naman ang Senado bangod 12 lamang sa mga Senador ang magapare-elect kag ang 12 ang magapabilin pa sa pwesto tubtob sa masunod nga piniliay.
Aminado ang konsehal nga ini ang political exercise apang nagalaom ini nga ang desisyon ang ibase sa ebidensya kag konsensya kag indi bangod sa partido sa politika.
Pahanumdom sini nga sa pagdesisyon indi dapat Pro-Duterte ukon Pro-Marcos kundi Pro-Filipino.
Ginakasubo sini nga may iban nga husto man ukon sala, sila ang Duterte kag Marcos gihapon.
Aminado man ang abogado nga kun kis-a may maayo man nga benepisyo ang pamulitika, bangod pinaagi sini nagakabuksan ang mga isyu nga dapat mahatagan sang kasanagan.
Apang nakita man sini nga kun dayunon ang impeachment trial subong nga 19th Congress, ang mga mamalidha ang impluwensyado na sang mga partido bangod sa handom nga makapabilin sa pwesto.
Paathag sini nga ang 215 nga Kongresista nga nagpirma ang magaserbe nga complainant samtang ang mga Senador naman ang hukom ukon judge.
Kun sa diin kinahanglan makakuha sang two-third votes gikan sa mga Senador ukon 16 gikan sa 24 agud mangin madinalag-on ang impeachment.
Gani, pahanumdom ni Novero nga yara sa kamot sang mga botante ang pagpili sang Senador bangod sa pagpili sang sala, ang pumuluyo ang una nga biktima, samtang sa pagpili sang husto, ang pumuluyo man ang una nga makabenepisyo.
