Ginapanugyan sang konsehal kag abogado sa mga manokan vendors nga ipalab-ot na lamang sa korte kun luyag nga kwestyonon ang pagpahalin sa mga manugbaligya bangod sa plano nga rennovation sang Manokan Country.
Nahibaluan nga may lease contract ang SM Prime Holdings sa Bacolod City Government para sa enhancement kag rennovation sang lugar gani nagpagwa man sang resolusyon ang ciudad nga nagasaylo sa mga vendors sa temporary location.
Apang hugot nga nagapamalabag ang vendors sa panindugan nga ang mga Chicken Inasal Vendors ang ginplastar sa Manokan Country pinaagi sa ordinansa sang 1983 kag ini ang nagaserbe na nga cultural heritage sang ciudad.
Sa interview sang Bombo Radyo Bacolod kay Bacolod City Councilor Atty Renecito Novero, sa idalum sang general principle sang layi sa Pilipinas, husto ang panindugan ni Atty Jomax Ortiz, legal counsel sang Manokan Vendors Association, nga indi ma-amyendahan ukon mamodify sang resolusyon ang isa ka ordinansa.
Apang may ginpagwa man nga desisyon ang Korte Suprema, nga nagapahanugot sang resolusyon sa paghimo sang pagbag-o sa ordinansa.
Gani kun luyag gid nga kwestyonon ang validity sang resolusyon nga gin-aprubahan sa Sangguniang Panlungsod, sarang ini nga mafile sa korte agud mahisayran kun ini ang nasulod gid man sa exemption sang Korte.
Dugang pa sini nga tuman ka broad sang ginatawag preservation sang cultural heritage, bangod indi man mapat-od kun kalakip diri ang pagdumili sa pagtandog, pagpanami ukon pagpatahom sa Manokan Country.
Paathag sini nga sarang makapa-utwas sang opinyon ang isa ka abogado, apang dapat ihatag na sa hukom ang legal conclusion.
Suno kay Novero, sang ginpatigayon ang pagboto, siya ang nag-abstain bangod sa legal consideration bilang isa ka abogado.
Apang pasalig sini nga antes paman na-aprubahan sa konseho, may committee na nga nagtuon sa proposal sa SM Prime Holdings Inc. gikan pa sa administrasyon ni former Bacolod City Mayor Evelio ‘Bing’ Leonardia, kag ginpadayun lang sa administrasyon ni Mayor Alfredo ‘Albee’ Benitez.
