Pabor ang konsehal kag abogado sa ciudad sang Bacolod sa pag-extend sang term of office sang Barangay kag SK officials sa apat ka tuig, apang aminado ini nga madamo ang mahimo nga magkwestyon.
Madumduman nga gin-aprubahan na sa 3rd and final reading sang Senado ang Senate Bill 2816 ukon ang proposed Act Setting the Term of Office of Barangay Officials and Members of the Sangguniang Kabataan, nga nakatipon sang 22 affirmative votes, zero negative votes kag zero abstentions.
Sa interview sang Bombo Radyo Bacolod kay Councilor Atty Renecito Novero, may gahom ang mga mamalidha sa paghimo sang layi nga makita sang mga ini nga makabenepisyo sa pungsod.
Apang lauman na nga may-ara sang magakwestyon sa term extension kasubong man sa matabo nga postponement sang Barangay and SK Elections nga natalana sa Disyembre subong nga tuig.
Isa sa ginalantaw ni Novero nga magakwestyon amo si Atty Romulo Macalintal, nga amo ang nagfile sa Korte Suprema nga nagresulta sa desisyon nga unconstitutional ang postponement sang eleksyon.
Paathag sang konsehal nga apisar may desisyon na ang Korte Suprema nga unconstitutional ang postponement sang eleksyon, ini ang sarang gihapon maligwat kun makita sang Korte Suprema nga may basihan ang term extension.
Sa personal nga paglantaw, kumporme naman si Novero nga palawigon sa apat ka tuig ang 3-year term sang mga local officials bangod para sa iya, honeymoon period ang 1st year kag campaign period ang 2nd year gani mas matapos sang mga opisyal ang ila proyekto kun apat ka tuig ang termino.
Para sa konsehal, madamo sang nakapagkit sa 1987 Philippine Constitution nga kinahanglan na nga ma-islan.
Suno diri, indi deserve nga makapungko sang kawatan nga public official bisan isa lamang ka adlaw, apang aminado ini nga problema na sa politika sa Pilipinas bangod ang kawatan ukon brutal gihapon amo ang ginasimba sang tawo.
Pahayag sini nga ang pagpili sang iban ang indi issue-oriented ukon Philippine-oriented kundi nagabasi sa relasyon kag bisan sala ang ginasuportahan partikular na kun may nabaton nga pabor.
Dugang pa ni Novero nga makapoy ang magkasunod nga eleksyon, gani pabor ini sa postponement, apang dapat nga magplastar sang fix period sang eleksyon.
Sa tion nga mapasar bilang layi, ini ang ipatuman, magluwas lamang kun magpagwa sang ruling ang Korte Suprema nga ini ang unconstitutional.
