Ginpasalig sang chairperson sang Committee on Laws and Ordinances sa Sangguniang Panlungsod nga initiating process lamang ang Resolution of No Objection (RONO) kag madamo pa sang labayan antes mapatuman ang reclamation project sang negosyante nga si Jerry Sy sa Barangay Banago.
Sa interview sang Bombo Radyo Bacolod kay Bacolod City Councilor Al Victor Espino, ginkumpirmar sang konsehal nga nabatun na sang Committee on Environment kag Committee on Laws sa Sangguniang Panlungsod ang RONO sang negosyante kag ila naman nga naaprubahan.
Paathag sini nga pagpasar sa RONO, ini ang pagadal-on pa sa National Agencies partikular na ang Philippine Reclamation Authority kag Department of Environment and Natural Resources (DENR).
Ginalantaw ni Espino, nga matapos lang ang ila termino indi pa makabalik sa Sangguniang Panlungsod sang Bacolod ang reclamation request gani mahimo nga ini ang mapatuman sa kamot na sang masunod nga mga opisyales sa ciudad.
Apang nakita sini nga wala man nagapamatok ang mga pumuluyo sa Barangay Banago, kundi luyag lamang nila nga amligan ang ila puluy-an kag palangabuhian.
Nagapati si Espino nga kun ini ang maaddress, wala naman sang problema sa pagpadayun sang reclamation project.// Pasalig lamang sini sa mga apektado nga pumuluyo, nga siya kag ang Bacolod City Council ang magadampig kag magaaway para sa magagmay nga sektor.
