Nagalaom ang konsehal sa ciudad sang Bacolod nga mangin madinalag-on ang pagbaligya sang P20 kada kilo sang bugas.
Sa interview sang Bombo Radyo Bacolod kay Councilor Jude Thaddeus Sayson, chairman sang Committee on Agriculture and Fisheries sa Sangguniang Panlungsod, ginpasalamatan sini si President Ferdinand “Bongbong” Marcos Jr. bangud ang Bacolod City ang isa sa mga nauna nga mga Local Government Units nga makabaligya sang P20 kada kilo nga bugas.
Ginpasalamatan man ni Sayson si Department of Agriculture Secretary Francisco Tiu Laurel Jr., nga napatigayon ang programa.
Suno diri, nakadepende na sa National Food Authority ang kalidad sang ibaligya nga bugas.
Gin-athag man sini nga ang makabakal lamang sang P20 per kilo nga bugas ang mga indigents, senior citizens, persons with disabilities, kag solo parents.
Subong nga aga igalunsyar sa Burgos Public Market ang pagbaligya sang P20 per kilo nga bugas.
Ginpahayag sang presidente sang Federation of Bacolod Vendors Association nga mabakal ang tawo sang nasambit nga bugas bangud barato apang sa kalidad mapili gid ini.
Sa interview sang Bombo Radyo Bacolod kay Lucilyn Dela Paz, igalunsyar ang programa sa Burgos Public Market kag madungan man sa pagbaligya ang Central kag Libertad Public Market.
Wala pa man ini nakahibalo kun ano gid ang kalidad sang bugas apang nagapati ini nga mabakal ang mga pumuluyo bangud barato.
