Nagpasar sang resolusyon ang Bacolod City Council nga nagasuporta sa ano man nga legal initiative sang iban nga local government unit batok sa desisyon sang Korte Suprema nga pahanugutan ang mga commercial fishing vessel sa tanan nga municipal waters sa Pilipinas.
Sa interview sang Bombo Radyo Bacolod kay Councilor Jude Thaddeus “Thaddy” Sayson, chairperson sang Committee on Agriculture and Fisheries sa Sangguniang Panlungsod, ang resolusyon ang nagahatag sang full support sa tanan nga legal efforts nga naga-apelar sa korte suprema nga irekonsiderar ang ila desisyon.
Paathag sini nga ang mga baybayon sa Bacolod City gikan sa Barangay Banago, Brgy 1, 2, 3, 8, 10, 16, 35 Singcang Airport, Pahanocoy, Sum-ag kag Punta Taytay ukon ang mga coastal Barangays ang lunsay makabig nga Municipal waters.
Paathag sini nga ang masobra linibo nga mga magagmay nga mangingisda ang maapektuhan sa pagpahanugot.
Suno kay Sayson, bangod sa paglimit sang commercial fishing sa nasambitan nga baybayon, sa karun makadakop na sang dalagko nga mga isda sa Brgy 35 samtang bangod sa reforestation sang mangroves sa Brgy Sum-ag, nagarepopulate naman ang mga isda.
Apang kun pasudlan sang dalagkuan nga mga Commercial Fishing Vessels, mahimo balas na lamang ukon basura ang makuha sang magagmay nga mananagat, nga nagasalig lamang sa pang-adlaw adlaw nga makuha sa dagat.
