Nagapanawagan ang konsehal sa ciudad sang Bacolod sa mga telecommunications companies nga himoson ang mga nagaluyloy nila nga kable.
Sa interview sang Bombo Radyo kay Councilor Atty Caesar Distrito, author sang resolution nga nagapangabay sa telecommunications companies nga himoson ang mga nagaluyloy nga kable kag patindogon ukon islan sang mas mabakod ang ila mga poste.
Suno diri, kun mapabay-an kag indi mahimos, ini delikado sa mga pumuluyo nga nagabyahe kag nagalabay sa dalan.
Suno kay Distrito, tuman ka dako sang kwarta nga gakabaton sang mga telcos sa ila negosyo sa ciudad kag sa mga pumuluyo apang wala sang budget sa paghimos sang ila wires kag poste.
Pahayag sini, kun indi pa gid magsunod ang mga telcos, mapilitan ang Sangguniang Panlungsod nga magfile sang kaso kag magdagdag sang penalidad batok sa ila.
Samtang, suportado man sini ang ginpasa nga resolution ni Councilor Dindo Ramos nga pag-require sa telecommunication companies nga magbutang sang ila nga mga generator sets.
Suno kay Distrito, malaw-ay nga sa tion nga may katalagman kag wala sang kuryente, apektado man ang internet kag signal.
