Ginpanawagan sang konsehal sa ciudad sang Bacolod sa gobyerno nga dapat hagatan sang importansya ang mentalidad sang kabataan.
Sa interview kay Bacolod city councilor Al Victor Espino chairperson sang committee on education, dapat mapadaloman ang imbestigasyon kun ano ang rason kun ngaa nahimo sang duha ka menor de edad ang pagpangluthang sa kaangay nila nga estudyante sa Tacloban city.
Suno diri, wala sang bisan ano nga security ang makapugong sa natabo sa Tacloban city bangod ini may kaangtanan na sa mentalidad sang bata nga kun luyag niya manghalit sa iban, wala sang may makapugong sa ila.
Suno kay Espino, dapat hatagan importansya sang gobyerno nga malantaw ang mental aspect sang mga kabataan subong kag indi lang magsalig sa band aid solutions apang hibaloon gid kun ano ang sa likod sini.
Pahayag ni Espino, agud masiguro nga indi ini matabo sa mga buluthuan sa ciudad, natalana ini nga magpasar sang isa ka resolusyon nga dugangan ang kapulisan nga nagabantay sa palibot sang mga buluthuan agud nga kun may insidente man nga magluntad sa sulod ukon sa gwa sang eskwelahan, madasig ang pagresponde sang kapulisan.
