Patay ang konsehal sa ciudad sang Bayawan sa Negros Oriental matapos gin-ambush sang riding-in-tandem suspects kaina sang aga.
Suno sa Negros Oriental Police Provincial Office, ang biktima nga si City Councilor Alex Tizon, 66-anyos sang Barangay Villareal, Bayawan ang nagamaneho sa maroon nga Isuzu Crosswind Sportivo kag papauli na kuntani sa ila balay nagikan sa city proper, alas-10:40 sang aga.
Sang yara na sa national highway sa Barangay Villareal ang biktima, hinali lang nag-overtake ang mga suspetsado nga nagasakay sa motorsiklo kag ini ang ginpaarakan sang luthang.
Bangud sa madamo nga pilas nga naagom, gilayon nga napatay ang konsehal.
Nagaisahanon lang ang biktima sa salakyan nga nahulog sa karsada matapos ang krimen.
Narekober sang mga pulis sa crime scene ang apat ka fired cartridges sang .9mm caliber pistol.
Padayon pa ang imbestigasyon sang mga pulis agud matumod ang motibo sa krimen kag kun sin-o ang mga suspetsado.
Ang biktima ang isa ka retired policeman kag nagpadalagan sa pulitika sang tinalikdan nga eleksyon.
Assigned ini sadto sa Bayawan City Police Station kag nagretiro sa serbisyo lima na ka tuig ang nakaligad.
