Gin-athag ni Councilor Al Victor Espino nga sa P4.4 billion nga loan sang Bacolod City Government sa Development Bank of the Philippines, P279,300,000 diri ang gintalana para sa budget sang furniture and equipments.
Suno kay Espino, ini ang ginalakipan sang construction sang legislative building sa Barangay Villamonte nga may budget nga P85 million; construction ukon improvement sang mini hospitals sa Barangay Cabug, Vista Alegre, Alijis, Mandalagan kag Barangay 12 nga nagabalor P65 million; improvement ukon rehabilitation sang old city hall sa Barangay 13 nga may budget nga P27 million; construction sang Bacolod City Warehouse nga nagabalor P10,100,000; construction sang City Engineer’s Motorpool Area nga may budget nga P12,200,000; P3 million para sa improvement sang Tree Park sa Barangay Alalingan; P30 million sa construction ukon improvement sang city health complex; kag P47 million sa recovery, recycling complex kag Eco Park sa Barangay Felisa.
Suno sa konsehal, may mga nagagwa nga misconceptions kag misdeclarations gani iya ginaathag nga ang P279,300,000 ang ginabug-usan sang indi lamang isa kundi madamo nga proyekto.
Suno diri, sa karun nagahulat pa ang ciudad sa approval sang national government partikular na sang Department of Budget and Management.
Suno sa iya, ginahulat pa ang debt ceiling capacity sang Bacolod nagikan sa Department of Finance.
