Nagsabat na ang konsehal sa banwa sang La Castellana, Negros Occidental nga ginatudlo imbulbado sa recruitment scam sa mga residente nga luyag magsulod sa Philippine National Police.
Sa interview sang Bombo Radyo Bacolod kay Councilor Donato “Natnat” Dumaguit, siya ang isa man sa nabiktima ni Mary Jun Delos Santos sa natabo nga recruitment scam.
Suno kay Dumaguit, sang tuig 2019 antes pa sila nagkilalahay ni Delos Santos, ginapahayag nga kilala na ini kag abyan man sadto ni La Castellana Mayor Alme Rhummyla Nicor-Mangilimutan bisan pa nga yara pa sa serbisyo bilang police.
Suno diri, nakilala niya si Delos Santos sang naglagaw siya sa palamahawan ni Kapitan Bonbon Sacapanio, ang pakaisa man ni Delos Santos sa Barangay Cabagna-an, Old Pabrica sa nasambit nga banwa.
Nakita siya didto ni Delos Santos kag ginhambalan nga kun siya si SB Natnat kag didto ginplastar nga nagapasulod ini sa PNP kag kun may kilala irefer sa iya.
Suno kay Dumaguit, matapos ang isa ka semana may yara sang nagpalapit sa iya nga isa ka bata nga luyag magpatigayon kag upod man sini ang ginikanan.
Suno sa konsehal, ginhambalan man sini ang bata nga may kilala siya apang may bayad ang magpatigayon.
Suno diri, nagkadto ang applikante kaupod ang ginikanan kun sa diin gintawgan sini si Mary Jun Delos Santos kag sila nagsugilanon.
Bangud kinahanglan ang downpayment, ginhambalan ni Delos Santos ang bata nga kay Dumaguit nalang ihatag kag ang konsehal na ang mapadala sini sa iya.
Nagdamo naman ang nakahibalo kag nagparecruit bangud mahimo nga ginpahibalo man sang bata nga gin-refer niya ini kay Delos Santos.
Nagdangat sa P50 tubtob P100,000 ang ginapabayad ni Delos Santos kag ginalantaw nga nagdangat P11 tubtob P13 million na ang nabayad sang applicants sa iya.
Gin-athag man sini nga ang kwarta nga mabaton niya sa applicants, ginarekta sini padala kay Delos Santos paagi sa e-wallet ukon remittance centers .
Apang sang nakita sini nga wala pa sang may nakasulod humalin sang 2019 tubtob 2023, ginfollow-up niya ang application kay Delos Santos tubtob nga ginblock na siya sa contacts kag messenger.
