Ginserbehan sang warrant of arrest sa kaso nga rape ang isa ka incumbent Municipal Councilor sa banwa sang Moises Padilla, apang ini ang wala na sa puluy-an sang magpadulong ang mga kapulisan.
Suno kay P/Capt. Randy Babor, hepe sa Moises Padilla Municipal Police Station, ang suspetsado amo si Councilor Fred Bangcaya.
Paathag sang hepe nga ang warrant of arrest ang naggwa Oktobre 26 sang gab-i, gani ila ini gilayon nga ginserbe sa balay sang suspetsado pagkaaga.
Apang wala na ini nalab-utan sang mga kapulisan bangod nahibaluan nga nagleave ini sa opisina sumugod sang Oktobre 25.
Nahibaluan nga isa ka 18 anyos nga babayi nga Grade 11 student ang nag-akusar sa konsehal kag residente man sa nasambit nga banwa.
Alegasyon sang biktima nga humalin sang Enero tubtob Abril sini nga tuig, makapila na ini ka beses nga ginhimuslan ni Bangcaya.
Tubtob nga ang mga ini ang nagdangop na sa Moises Padilla Municipal Police Station sang Mayo agud nga ireklamo ang pagpanglugos.
Sa pihak nga bahin, ang konsehal ang nahibaluan nga nagfile man sang reelection para sa ikatatlo na sini nga termino bilang konsehal sa Moises Padilla.
Sa karun padayun pa ang pagpangita sang mga kapulisan sa suspetsado, bangod may nabilin pa ang mga ini nga 10 ka adlaw para maserbe ang warrant of arrest.
Nagapanawagan naman si Babor kay Councilor Bangcaya nga ini ang magsungka na sa kapulisan agud mapangatubang ang kaso.
