Ginpahayag sang chairman sang Committee on Transportation sa Sangguniang Panlungsod sa ciudad sang Bacolod nga kun isuspend gid man ang Public Transport Modernization Program ukon PUVMP dapat nga mahatagan sang kunsiderasyon ang mga nag-upod na sa programa.
Sa interview sang Bombo Radyo Bacolod kay Councilor Al Victor Espino, ang PUVMP para sa iya ang maayo nga programa para sa transport sector kag ilabi na sa mga commuters bilang kabilugan.
Suno kay Espino, madamo na ang nakigbahin sa programa kag kun isuspend gid man ang programa sa tion nga mapirmahan sang presidente ang resolution nga ginhimo sang senado, dapat lantawon man ang mangin epekto sa mga ini.
Ginpahayag man sini nga indi lang dapat ang nagapamatok sa programa ang lantawon kundi ang mga nagupod man diri.
Suno kay Espino dapat lantawon gid sang implementing agency ang konsekwensya sang ila mga tikang nga ginahimo.
