Natalana nga reviewhon sang Sangguniang Panlungsod sang Bacolod ang kontrata sang Bacolod City Water District (BACIWA) kag Prime Water Inc.
Kahapon, nagpatawag sang public hearing ang ciudad sang Bacolod sa pagpanguna sang chairperson sang Committee on Energy and Public Utilities may kaangtanan sa pagreview sang kontrata sang nasambit nga water concessionaires.
Sa hearing, gintalakay ang kontrata sa tunga sang BACIWA kag Prime Water kun sa diin nakita kag mabatyagan gid ang kapaltahan sa bahin sang pribado nga kompanya, nga nagapaantos sa madamo nga Bacolodnon.
Suno kay Councilor Claudio Jesus “Kalaw” Puentevella, matapos ang pagreview sang kontrata magahimo man ang Committee on Energy and Public Utilities sa Sangguniang Panlungsod sang rekomendasyon.
Suno kay Puentevella, nakahibalo naman ang tanan kag nakita ang kakulangan kag kapaltahan sang BACIWA kag Primewater nga indi pagsunod sa nakasaad sa kontrata.
Ginpahayag man sini nga nagrekomendar man ang mga ini nga ireview man sang Local Water Utilities Administration ang kontrata sang Baciwa kag Primewater.
Sa tion nga makita nga mabug-at ang ginlapas sang BACIWA-Primewater sa kontrata magapasa ang Committee on Energy and Public Utilities sang report sa Local Government Unit agud nga makahimo sang tikang angot diri.
Nagalaom man ini nga napadangat sa mga pumuluyo ang rason kun ngaa nagpalpak ang BACIWA kag Primewater paagi sa public hearing.
