Ginkumpirmar sang Project Development Officer 4 sang Bacolod City Cooperative and Livelihood Office nga sila ang nagpadala man sang sinako nga bugas nga mabaligya sa balor nga P20 sa mga kooperatiba kag asosasyon.
Sa interview sang Bombo Radyo Bacolod kay Brenda Bordeus, ginaproseso na lamang nila sa karun ang mga reports sa pagbaligya sang 5,880 ka sako sang bugas.
Kalakip sa mga gindagdagan amo ang mga merkado, kasubong man ang mga qualified sa Bacolod City Government Center, lainlain nga Barangay, kag mga kooperatiba kag korporasyon.
Ginpahayag ni Bordeus nga 600 ka sako sang bugas ang ila ginpadala sa masobra 200 nga kooperatiba kag asosasyon sa Bacolod.
Nahibaluan nga ang sarang lamang maka-avail sang P20 per kilo nga bugas amo ang mga vulnerable sector kaangay sang indigent, senior citizens, persons with disability kag single parent.
Suno diri, may mga miyembro man ang mga kooperatiba kag asosasyon nga makasulod sa criteria sang mabaligyaan.
Nagapati ini nga bangod limitado lamang ang sako sang bugas nga ginhatag sa mga kooperatiba kag asosasyon, nangin prayoridad sa pagbaligya ang mga vulnerable sector.
Dugang pa ni Bordeus nga maximum nga napulo ka kilo lamang ang sarang mabakal sang kada persona.
Sa karun, ginatinguhaan nila nga mabalik ang kita sa pagbaligya sa ciudad agud ini naman ang magamit sa pagbakal sang panibag-o nga supply sang bugas sa Food Terminal Incorporated gikan sa Sugar Regulatory Administration, agud liwat nga makabaligya.
