Nagapati ang Regional Director sa Philippine Drug Enforcement Agency (PDEA) region 6 nga dako ang impact sa kumunidad sang madinalag-on nga anti-illegal drug campaigns sang koordinasyon sa tunga sang nanarisari nga law enforcement agencies.
Suno kay PDEA 6 Director Alex Tablate, sang 2017, yara palang sa 2 porsyento ang mga nadrug cleared nga barangay sa bilog nga Western Visayas, apang sa karun nga tuig 2022 ini ang nagadangat na sa 87 porsyento sang mga barangay.
Paathag ni Tablate nga nangin madinalag-on ang mga anti-illegal drugs campain sa bulig sang Philippine National Police (PNP) kag Philippine Coast Guard.
Samtang bangod dalagko ang balor sang droga nga narecover subong nga tuig, nagapati ini nga dako man ang pagbuhin sa supply sang mga dorugista.
Madumduman nga sang Enero, sa K-9 Panelling sang PDEA upod ang PCG sa BREDCO port kun sa diin nakakuha ang mga ini sang tatlo ka kilo sang shabu.
Samtang kasunod naman nga may nakuha nga mga dalagko nga balor sa syudad sang San Carlos.
Suno kay Tablate, dako gid ang accomplishment sa pagbuligay sang mga law enforcement agencies indi kaangay sadto nga nagakanya-kanya ang mga ini sang hulag.
Dugang pa sini nga dako man nga nakabulig man sa mas matawhay nga koordisyon bangod classmate man sa Philippine Military Academy sanday PDEA Director Wilkins Villanueva kag PNP Chief Gen. Dionardo Carlos.
Kadungan man sa tuman ka dako nga accomplishment sa koordinasyon sang PNP kag PDEA amo ang pagkadakop sa mga drug lord sa Valenzuela kag pagkarecover sang balor P1.1 billion nga suspected shabu.
Nagalaom man si Tablate nga magapadayun ang maayo nga relasyon sang mga nasambit nga law enforcement agencies nga dako nga benepisyo sa kumunidad.
Pahanumdom man sini sa mga personnel nga indi dapat ang mga ini magpakigbato sa iligal nga droga bangod lang sa trabaho, kundi bangod sa tinutuyo nga masalbar ang pamilya kag ang kumunidad gikan sa halit sang iligal nga bulong.
