Nabaton na sang Sugar Regulatory Administration ang kopya sang temporary restraining order nga ginpapanaog sang mga korte sa Negros Occidental batok sa importasyon sang 200, 000 metric tons sang refined sugar.
Sa interview sang Bombo Radyo Bacolod kay SRA Administrator Hermenegildo Serafica, duha ka korte ang nagpapanaog sang TRO – ang Regional Trial Court Branch 73 sa Sagay City kag RTC sa Himamaylan City.
Ang hearing sa ciudad sang Himamaylan ang gintalana bwas samtang sa Pebrero 24 naman ang sa RTC Branch 73.
Suno kay Serafica, magapadala ang ahensya sang representative sa Himamaylan bwas bangud face-to-face ang hearing.
Bangud nagapadayon ang kaso sa korte, nagbalibad na si Serafica nga maghatag sang komento angot sa writ for preliminary injunction bangud indi niya luyag nga majeopadize ang position sang SRA.
Ginkalipay naman sang sugar industy leaders sa Negros Occidental ang pagpabor sang korte sa ila ginahingyo nga punggan ang order sang Sugar Regulatory Administration nga mag-import sang 200, 000 metric tons sang kalamay.
Sa interview sang Bombo Radyo Bacolod kay Manuel Lamata, presidente sang United Sugar Producers Federation (UNIFED), nagdangop sila sa korte bangud wala ginpamatian sang Sugar Regulatory Administration ang ila sulat nga nagahingyo nga iisol ang importasyon sa off-milling season kun sa diin mahibaluan ang kadamuon sang kulang nga supply.
Suno kay Lamata, ini ang una nga kahigayunan nga nagfile sila sang kaso sa korte bangud halin sang nagpungko si SRA Administrator Hermenegildo Serafica, wala sini ginapamatian ang hingyo sang sugar industry.
Panindugan ni Lamata, kun off-milling season kuntani patigayunon ang importasyon, maimbentaryo na ang kabug-usan nga stock sa mga bodega kag sa central kun sa diin ang kulang lamang sa konsumo sang mga Pilipino ang iimport kag indi magnubo ang presyo sang lokal nga kalamay.
Nagalaom man ini nga mangin paborable ang desisyon sang korte sa injunction case ukon maextend saang TRO.
Ang hearing para sa motion for the writ of the preliminary injunction ang patigayunon sa Pebrero 24.
