Pilason ang empleyado sang korean restaurant matapos nga mabungguan samtang nagatabok sa pedestrian lane sa Lacson Street, Barangay Mandalagan, Bacolod City, sa atubang lamang sang estasyon sang Bombo Radyo Bacolod.
Ang biktima nga ginkilala nga si Christine Bacorna ang magatabok kuntani kag sang yara na sa pihak nga lane, nagpundo ang awto ni Redgie Arellano nga padulong sa Talisay City agud hatagan sang ligwa ang pedestrian.
Apang sa pagpondo sang awto, hinali nga nag-overtake ang motorsiklo nga ginamaneho ni Noel Cornias gani nabungguan sini ang biktima.
Bangod sa impact, magluwas sa biktima, ang driver ang naglabog man gikan sa motorsiklo kag nakaangkon man sang pilas.
Gilayon man nga gindala sa ospital ang duha ka nasamaran para sa nagakaigo nga pagbulong.
