Ginbawi sang Miss Grand International ang 2nd runner-up title gikan kay Ms. Myanmar Thae Syu Nein.
Sa social media post kahapon, gin-athag sang beauty organization nga ang desisyon ang tuga sang indi husto nga pamatasan kag mga tikang nga nagabayolar sa pila ka regulasyon.
Dugang pa nila nga ang announcement ang ginpagwa para sa ihibalo sang tanan.
Una na nga nareport sa Thai media nga gintapos na ni Miss Grand International President Nawat Itsaragrisil ang franchise sa Myanmar matapos wala ginbatun ni Thae Syu Nein ang korona bilang second runner-up sa kompetisyon.
Pahayag ni Nawat nga delusional ang beauty queen kag kun luyag sini nga mangin first place, suhestyon sini nga magtukod na lamang sang kaugalingon nga pageant agud madaog ang tanan nga title.
Nagpatuman naman sang lifetime ban ang Miss Grand International kay Miss Grand Myanmar National Director Htoo Ant Lwin bangod sa kakulang sang sportsmanship kag business credibility.
Matapos ang coronation night, ginpahayag ni Thae Syu Nein sa iya Facebook Live nga indi sini batunon ang korona.
Suno diri, wala sang bisan sin-o nga makakontrol sa iya kag siya ang nagahimo sang kaugalingon sini nga desisyon, kag ginpili sini nga ibalik ang korona bilang second-runner up bangod ini ang indi nagakadapat para sa ila.
Nahibaluan nga ang ginkoronahan bilang Miss Grand International 2024 amo si Rachel Gupta sang India samtang 1st runner up naman si CJ Opieza sang Pilipinas.
