Gindeklarar nga null and void sang Bacolod Regional Trial Court ang extrajudicial settlement (EJS) sa propidad sang bilyonaryo nga Yanson clan, nga nagapanag-iya sang pinakadako nga bus company sa Pilipinas.
Sa ruling ni Branch 45 Presiding Judge Phoebe Gargantel-Balbin sang Enero 21, 2025, gingrant sini ang petisyon ni Yanson matriarch Olivia V. Yanson nga manullify ang EJS sa propidad sang iya bana nga nagtaliwan sang Oktobre 25, 2015 nga wala sang nabilin nga last will and testament.
Ginpanguyatan sang hukom ang bug-at sang claim sang 91 anyos nga asawa, nga wala sini ginwaive ang 50 porsyento nga share sa ila conjugal property, kasubong man wala sini ginwaive ang 1/7th share gikan sa share sang iya bana sa joint estate.
Suno kay Olivia, wala ini nagsugot sa EJS nga nagapakita nga ginwaive sini ang tanan niya nga shares, nga gin-attach sa main document matapos sang iya pagpirma.
Sa Civil Code of the Philippines, ginamando ang conjugal partnership ukon equal ownership sa mag-asawa magluwas lamang kun ang duha ka partido ang may pinirmahan nga prenuptial agreement ukon iban pa nga marriage settlements.
Dugang pa sang hukom nga ang EJS ang wala napublish sa diin man nga newspaper, natuhoy sa extrajudicial settlement sang propidad sang nagtaliwan nga si Mr. Yanson; gani ang EJS kag annexes ang wala nafile sa Registry of Deeds.
Apang ginbasura naman sang judges ang claim ni Olivia para sa damages.
Apisar nga ang EJS ang gingamit sang pihak nga kampo sa pagfile sang nanarisari nga kaso, paathag sang hukom nga ini ang natabo antes paman madeklarar nga null and void ang EJS.
Dugang pa sini nga kulang man ang ebidensya nga makapamatuod nga may malain nga tinutuyo ang defendant agud ma-award ang attorney’s fees.
Bangod sa desisyon, si Olivia amo na sa karun ang may pinakadako nga ownership sa transport sektor kalakip na ang Vallacar Transit Incorporated, Ceres Liner Travel and Tours Incorporated, Ceres Transport Incorporated, Mindanao Star Bus Transport Incorporated, Bachelor Express Incorporated, Southern Star Bus Transport Incorporated, Gold Star Bus Transit Incorporated, kag Rural Transit (Mindanao) Incorporated.
Bangod ginkuhaan sang mana ni Olivia ang apat sini ka kabataan, nagakahulugan nga ang duha na lamang ka mag-utod ang makaangkon sang share sa propidad.
Ang nasambitan nga EJS ang madumduman nga nag-ugat sang mainit nga away sa pamilya nga nagtay-od sa nationwide bus fleet nga nagacater sang masobra 850,000 ka mga pasahero kada adlaw.
Yara sa kampo sang matriarch ang agot sini nga si Leo Rey, nga amo ang president kag CEO sang Vallacar Transit, kag ang bata nga babayi nga si Ginnette Y. Dumancas.
Samtang magkaupod naman sa pihak nga kampo sanday Roy, Emily, Ma. Lourdes Celina Y. Lopez, kag Ricardo Jr.
Sila ang may isa pa ka bata nga una nga nagtaliwan antes pa mapatay si Mr. Yanson.
