Ginalantaw sang political analyst nga mahimo magpagwa sang desisyon ang Korte Suprema angot sa mga petisyon nga nagapa-untat sa impeachment complaint batok kay Vice President Sara Duterte sa bulan sang Marso.
Sa interview sang Bombo Radyo Bacolod kay Atty Jomax Ortiz, ginapanindugan ni VP Sara nga unconstitutional ang pagconsolidate sa tatlo ka nauna nga impeachment complaint sa ikaapat nga amo ang ginhimuan sang articles of impeachment.
Ang petition for certiorari ang may kaupod man nga prohibition ukon pagdumili sa Senado sa pagpadayun sang impeachment trial bangod defective ang impeachment complaint.
Tindog sini nga sa impeachment nga ginpirmahan sang 215 ka mga kongresista, ang kada isa sa mga nagpirma ang dapat mag-oath sa atubang ni House Secretary General Reginald Velasco.
Apang ang natabo, minutos lamang nadesisyonan na ang articles of impeachment, gani imposible para sa mga ini nga nahimo ang isa-isa nga oath taking sang 215 ka kongresista sa nasambitan nga tion.
Sa pihak nga bahin, ang petisyon sang grupo sang mga abogado sa pagpanguna ni Atty Israelito Torreon ang nakasentro naman sa unconstitutionality sang makapila nga pagfile sang impeachment complaint.
Panindugan sini nga sa konstitusyon, may one-year ban sa filing sang impeachment apang sa karun magluwas sa nauna nga tatlo ka impeachment complaint, ang House of Representatives ang nagpirma sang articles of impeachment.
Panindugan nanday Torreon nga ang kada isa ka complaint ang makabig na nga action gani ginakatingala nila nga ini ang ginpadayun lamang apisar sa paglapas sa Article 11 Section 3 sang 1987 Philippine Constitution.
Balantayan pa sa karun kun dayunon ang impeachment trial antes ang May 12 National and Local Elections ukon hulaton pa ang State of the Nation Address 2025.
Sa pihak sini, sa 15 ka mga husgado, 13 diri ang appointee ni former President Rodrigo Duterte kag ang duha ang appointee ni late President Benigno “Noynoy” Aquino III.
Nagapati ang political analyst nga dako ang epekto sang desisyon sa dalagan sang 2025 Midterm Elections.
